რატომ ხდება, რომ თანამედროვე საზოგადოებებში სიყვარულმა საბაზრო ღირებულება შეიძინა და შეყვარებაც მოულოდნელ, აუხსნელ სამყაროში თავით გადაშვებას კი აღარ ჰგავს, არამედ კომერციულ გარიგებას? რა ისტორიული და სოციალური საფუძველი აქვს ამ ფენომენს? რა გზა გაიარა ანტიკური ხანის ჯადოსნურმა სიყვარულმა და როგორ იქცა იგი გვიან კაპიტალისტური ეპოქის განჯადოებულ პროექტად? - სწორედ ამ საკითხებს ეხება ლივ სტრომქვისტი - მსოფლიოში აღიარებული შვედი მკვლევარი, სატირისტი, ესეისტი და კომიქს- ავტორი. 

თავის ლიტერატურაში, რომელიც ოცდაათ ენაზეა თარგმნილი და თანამედროვე გრაფიკული ჟურნალისტიკის გამორჩეულ ნიმუშად მიიჩნევა, ლივ სტრომქვისტი მოსაზრებების გასამყარებლად იშველიებს როგორც ისტორიულ და ფილოსოფიურ წყაროებს, ასევე - მითოლოგიურ სიუჟეტებსა და პოპ-კულტურაში დამკვიდრებულ წარმოდგენებს. ამ გზით კონკრეტული საკითხის სიღრმისეული ანალიზი ხელმისაწვდომი ხდება ნებისმიერი მკითხველისთვის.